top of page

劉美玲 Lemon

已更新:2023年10月4日



自己無諗過經歷完2019年之後,本身已經積積埋埋太多唔開心嘅事,無論係響屋企、朋友圈、教會裡面,可以傾得埋一齊分享嘅人真係少之又少。舊年年頭發生咗幾件事,仲要係響同一個月裡面,中咗COVID-19已經病到死死下,連行落床嘅力氣都無,仲要面對生離同死別,詳細我唔想講。當時嘅我,真係覺得生無可戀,一次又一次嘅打擊,好唔明白點解上帝要咁樣安排,開始埋怨上帝,覺得要離開信仰。


其實我當時好認真咁打算用幾個月時間去安排自己嘅身後事,覺得就算死,都唔好搞到人哋太麻煩。又開始躺平,唔想再做以前鍾意做嘅嘢,連嘢都唔想食,慢慢個身體開始出咗啲問題。


跟住有一日,有個朋友搞一個行山活動,我見咁耐無活動過就去啦,去呼吸下新鮮空氣,諗下嘢都好啦,反正響屋企屈到好悶。就係響呢個活動,遇到一個路過嘅人,佢無端端同我講,佢好唔開心好想自殺⋯⋯當時我聽完,呆哂,仲心諗上帝到底想點?兩個想自殺嘅人走埋一齊,其實會點?當刻我其實唔識得點樣去回應呢個人,我只係靜靜咁聽佢嘅故事,用最簡單嘅說話安慰佢,響安慰佢嘅同時,我自己又得到安慰。


之後我都仲有繼續行山,陸陸續續遇到好多唔同嘅人同事,聽到嘅經歴令我嘅生命起咗變化,產生好多思考空間。而正好響我思考緊嘅時候,嗰一個星期聽到嘅訊息或者睇到嘅經文,就正好回應到我思考緊嘅問題。最奇怪嘅就係,我當時係返緊3間唔同嘅教會,但竟然帶出嘅訊息係差唔多,好似聽咗3次咁。


宜家望返轉頭,呢四個月,上帝正正係慢慢咁拉返我離開深淵,離開唔適合自己嘅群體,上帝係好明白我嘅委屈,用方法去安慰我。


我透過大自然認識信仰,我會繼續向高山舉目,繼續學習用上帝嘅視野去實踐信仰生活。


點解會洗禮:

其實三間教會同時都開洗禮班,響flow church聽到洗禮嘅時候,係最有感動去做,因為有感動,所以行動。




見証錄音:





107 次查看0 則留言

最新文章

查看全部
bottom of page