top of page

李美華 Juliea

已更新:2023年6月3日

主嘅大能好神奇,佢先使我跌倒,再用一啲「估你唔到」嘅方法一步一步拉住我拯救我!


平安各位弟兄姊妹各位來賓


我係Juliea,今日受浸禮嘅信徒之一。好開心能夠成為flow church一份子。正如flow church聖餐BYOC (Bring your own cup)的理念——體現破碎肢體的聯合——我都係帶着一個孤獨、支離破碎嘅心嚟到flow church 呢個基督教教會,融入呢個群體!


點解要成為基督徒?

我想我嘅罪可得赦免,

我要成為一個新造人,

我要進入天國得永生!


經歷過人生嘅低谷,分離、失望、痛苦,係主呼召我使我得救!主嘅大能好神奇,佢先使我跌倒,再用一啲「估你唔到」嘅方法一步一步拉住我拯救我!

婚姻關係破裂、毛孩過世,自己都唔想見到自己,喺我對生命生活感到絕望無助,想放棄自己嘅時候,主呼召我!

狗狗過世未到一星期,主透過鄰居塞咗一竇貓俾我,貓媽媽+3隻貓B,2日後又多2隻貓B(因為義工喺西貢發現有兩隻貓B冇媽媽唔肯進食手餵奶,所以送過來俾貓媽媽餵奶),結果一時間有六條生命喺我手!加埋原有嘅1狗2貓共有9條命。我心裡說:「你想放棄自己生命時,主就用9條命拯救你!」

喺這些年期間,不斷有新的毛孩加入,有些離開。曾經問主,點解要咁對我,我好辛苦。照顧佢哋冇回報! 現在回想,主透過毛孩喚醒我嘅「愛」,叫我要學會忍耐、柔和、謙卑。

*忍耐、柔和:教狗去尿尿,訓練指令。馴服一隻兇惡的街貓。

*謙卑:唔識嘅要去問人請教人聽人經驗分享,先有得着。

呢啲係主嘅教導!


出世至40歲,都係住喺港島區,搬入大埔,就好似去咗外國咁冇朋友,好孤獨!主除咗安排毛孩俾我,仲透過一個好獨特嘅方法,使我認識好多大埔人,教會基督教嘅朋友!

話說,我同一班中學同學打羽毛球時拗柴,好黑仔!我雖有腳患,擔住拐杖去街市買菜,跟菜檔姐姐傾談時,佢叫我一齊打羽毛球,結果我就認識咗一大班大埔人,基督教朋友!

主,真係先使我跌倒再一步一步挽回我,教導我!


羽毛球朋友帶我去佈道會,我受感動後,決志了。以為決志我便可以成為基督徒,點知主還要考驗我。喺之前嘅教會我受到傷害,令我想放棄,但主並沒有放手,佢再動用一班弟兄姊妹鼓勵我,幫助我再次投入主嘅懷抱。

姊妹引領下我聽到fc嘅「神學八課」我好有得着,令我釋懷放下!


今日我帶着這樣的「經歷」嚟到呢度,領受聖父聖子聖靈嘅恩典成全,受浸禮,成為一個「新造人」。我諗我嘅改變,喺我身邊嘅丈夫、同事、親人最為感受得到。以前嘅我⋯惡,現在我⋯點講都唔係溫柔但係都叫做柔和嘅。😅


我家現有5狗10貓!


感謝主嘅恩典。感謝flow church安排,感謝牧者嘅教導帶領 🙏,感謝各小組成員嘅鼓勵分享🙏 ,Amen。



見証錄音:





83 次查看0 則留言

最新文章

查看全部
bottom of page