陳詩諾 Steven

其實從細個開始，我已經喺教會環境下長大。

印象中小學甚至更細個嘅時候，媽咪已經帶咗我返教會返主日學。對我嚟講，好多聖經嘅故事都耳熟能詳，自己亦都習慣咗週末總會有一日返教會。但係一直以嚟，我對呢啲聖經入邊嘅事蹟都只係覺得故事咁睇，從來冇將當中嘅教導同埋自己嘅生命連結一起。呢個情況去到臨近升中開始更加明顯，當時甚至會覺得返團契，面對團契導師嘅關心會有壓力。

好感恩，天父一路都看顧我成長嘅腳步。由中學畢業之後去到大學，一路都保守住呢個係信仰上冇乜追求嘅男仔。雖然冇一個規律嘅信仰生活，但身邊總係會有唔同嘅天使，透過唔同事，或許係暑期服侍，或許係大學嘅團契生活，帶返我去教會入面。

好記得大學Final year嘅時候，當時嘅自己諗咗一條問題好耐，就係:“呢個面對咗10幾年嘅信仰 歸根究底對我嚟講係啲咩呢？”。

多得當年信仰入邊嘅好夥伴陪我認真討論，甚至將當時關係入邊嘅一啲難題都交託比天父，令我確信，我係天父嘅兒子，喺佢愛裏沒有懼怕。或許喺人眼中唔可能嘅事，在神卻能。

“你參加水禮嘅原因係啲咩啊？”對於呢條問題，令我諗返起以前小組組長都經常問我點解仲未參加浸禮。當時嘅回覆都係以唔同藉口推搪就算，但回望過去，其實一路以都好清楚見到天父喺我人生唔同階段都有佢嘅計劃。或許有啲安排係好願意接受，亦都有啲係百般唔情願地接受。但不論點都好，現在嘅我確信天父係我嘅開路者，我需要做嘅只係安然接受，咁就足夠。

對於行水禮，當以前諗究竟自己係咪一個合格基督徒嘅時候，就會覺得未參加浸， 未係一個100%嘅信徒。但喺大小講道或牧養中，我清楚明白到浸禮本身只係一個儀式，並唔會令我有任何實質改變。我本身已經係一個蒙福嘅罪人，現今要做嘅，就係喺眾人面前作好見證。

喺我準備呢篇嘢嘅時候，回想到平時聽好多經歷咗大小人生高低起跌嘅見証分享。諗返轉頭，自問20幾年生活當中，並沒有啲驚天動地嘅經歷，但調返轉，其實正正就係天父恩典滿滿嘅最好證明。

所以，今次參加水禮，最主要原因就係想打破之前嘅拖延，更加擁抱天父兒子呢個身份，同埋更好地愛身邊唔同嘅人。

見証錄音：