top of page

蕭月媚

已更新:2023年6月2日

我們愛,因為神先愛我們 。(約翰一書四章19節)


今次,嚟真嘅!


大家好,我係Janet。


我好認同牧者阿婷講受浸係一個公開見證,由小學學校團契到加入唔同教會中間散散聚聚。直到今年,決定咗要嚟真,受浸並公開宣認為基督徒,一生跟隨耶穌。


小學時就讀基督教學校已經認識耶穌,細個嘅時候祈禱只識向耶穌「祈求」,後來先知道自己亦要有行動。小六畢業營後開始教會生活。初中時進入青春期,自我價值極低嘅同時又極度自我,覺得自己冇任何價值,經歷咗一段好長嘅暴風反叛嘅青春期,其實只係希望父母,老師會留意和關心我。係教會我感受到每一個人都係平等,被重視,喺嗰度可以暫時放低所有重擔,當時覺得教會係唯一一個可以令自己感到安全,可以真正休息嘅地方。直到高中,當時太渴望被愛及被重視,為咗得到更多愛,渴求欣賞,認同,得到剎那安全感,即使唔適合,自己依然選擇堅持努力維繫一段病態嘅愛情,同一個完全唔適合嘅男仔開始拍拖,帶住無數未處理好情緒,病態地依附一個原本係陌生人既男朋友 ,努力盲目討愛,亦因為咁離開左神,離棄左自己,同屋企人關係更差。一段有毒,愛到近乎窒息嘅愛情關係,為自己製造咗更多問題。但回想起來,感謝神一直保護我,最終讓我能夠離開這段病態愛情。


後來我為左重新掌控自己人生,為左盡快搬出黎自己住,開始非常勞碌奔波嘅生活,以為離開咗原生家庭,就可以解決所有一直解決唔到嘅問題,亦期望快點組織屬於自己的家庭而盡快結婚。結婚前一個月,分左手。因為「悔婚」而睇到好多人性醜惡,經歷左人生最黑暗最無助既日子 。人到咗最絕望加上遍體鱗傷時候,「自我」就會縮小,會真正認清自己,知道乜嘢對自己先係最重要。但十分感恩,在工作上認識到一位傳道人,佢帶我返教會,令我重拾教會生活,經歷小組組員的同行、真正接納和愛。


兜兜轉轉,放棄過自己無數次,同自己過唔去無數次,埋怨過「命運」無數次,「質問」過天父無數次。發現恩典比一切多。


700萬人會有700萬種唔同嘅生活方式,每日每人都做緊無數嘅唔同選擇,而天父選擇左用無條件嘅愛先愛我地,佢選擇左做每一個人係天上嘅爸爸,我哋係無條件,唔需要努力,就可以成為佢嘅兒女,無條件得到佢無窮無盡嘅愛,只要我哋選擇相信就得。


黎到流堂之後,今次,決定嚟真,受浸只係歸入基督嘅開始,成為基督徒,唔代表一帆風順,有可能會有更多風浪,以後無論係風和日麗,定係黑暗恐懼的日子,都會溫柔堅定,有神同行。


最後,分享一句我最鍾意嘅金句比大家,黎自約約翰一書四章19節:


我們愛,因為神先愛我們 。



55 次查看0 則留言

最新文章

查看全部
bottom of page