譚凱量

由細到大，喺屋企聽得最多嘅一句說話就係：「凱量，你唔係唔識做㗎，你只係無俾心機認真做啫。」

呢句說話，幾乎可以概述我人生前半場嘅情況。

年少時嘅輕狂，初入社會時嘅自以為是，總覺得「只要我想做，就一定做到」結果留低咗好多污點同錯誤。感謝屋企人，佢地都用咗好多耐心、愛同包容，陪我用咗好長時間去修正過去嘅錯誤同壞習慣。

過去二十幾年，我不停自責、內耗，喺腦海入面折磨自己。直到2024年，我先明白自己需要一d 改變同幫助。

對於一個i 人，仲要係 i 到iMax嘅人，要喺咁多人面前公開分享自己嘅經歷同軟弱，的確需要好大嘅勇氣，但係我仍然好想藉住呢個機會，向所有失去信心、盼望，覺得軟弱同疲乏嘅你：主耶穌並無忘記你，佢一直都記念住你，佢知道你一切嘅難處。

2024年，上帝差咗一位我生命裡嘅天使嚟到身邊，帶我去到Flow Church。因為音樂，我參加咗我第一次嘅基督教崇拜，其後每次參加崇拜，每次聽到詩歌，我嘅內心都會得到安慰同鼓勵；聽牧者講道，又慢慢改變咗我好多幼稚同錯誤嘅想法。

到2025年1月，我聽到John牧師一次講道，題目係《變變變，如果我們的信仰是一次變身》，崇拜完之後，我主動走上前同John講：「John，可唔可以帶領我？我想要決志跟隨耶穌。」就係咁，我成為天父嘅兒子。

最近一年，我的事業開始咗新嘅一頁。從零開始，由0到0.1, 所有進展我都一一向主祈求、向主禱告。感謝主賜俾我能力同智慧，我好想用行動去回應佢嘅恩典，所以我參加咗Club你試嘅招募，用我嘅能力去事奉，更要透過今日嘅水禮，向主表明我願意全心歸信、跟隨耶穌，學習做一個合用嘅器皿，將基督嘅香氣帶俾身邊的人。

最後，我想分享果位天使同我講過嘅一句說話：

「你可能而家仲未認識主，但係其實佢一直都看顧住你。你試下合埋眼，諗住一件你好渴望嘅事，主會聽到你嘅呼求。」

今日，我好感恩，因為我親身經歷咗呢句說話，希望你都會同我一樣，參加下一次嘅水禮。

見証錄音：